السلام عليكم ورحمة الله وبركاته
من امتع الفيدوات اللي احب اشوفها بيوتيوب اهيا whats in my bag او ماذا يوجد في حقيبتي عشان جذي قررت ان اول تدوينه رسمية لي راح تكون بهالموضوع ، بسم الله نبدي
الجنطه اللي قاعده استخدمها حاليا وصارلي تقريبا ٣ اشهر ما غيرتها اهيا louis vuitton speedy 30 damier ebene
وايد حبيت الجنطه لانها عملية و ما تتو صخ بسرعه وتلوق مع اغلب ملابسي غير هذا الجنطه وايد حجمها مناسب بالنسبة لي وتشيل وايد اغراض عشان جذي صارلي فترة معلقه عليها غير اسباب الكسل طبعاا .
محتويات حقيبتي :
١. قلم : هالقلم خذيته من محل بالافنيوز صاير صوب بروي سطرة محل لاش اسم المحل campo marzio design هالمحل عجيب تلاقون في جميع انواع واشكال الاقلام الناشفه والسائلة وحتى اقلام الريش تحصلون عنده غير هذا تلاقون فيه نوتات ملونه عجيبة حق الجنطة و فايلات و اطقم مكاتب تشكيلته صج واايد حلوة وحق الناس اللي يحبون سوالف المكتبات نفسي انا ورفيجتي تمينا فيه تقريبا نص ساعه والمحل ٣ امتار ب ٣ امتار فيعني ماله داعي اقولكم شكثر استانست على هالمحل وعقب حوسه نص ساعة استقريت على هالقلم لاني اموت بالمنقط وحبيت اللون واخترت الحبر يكون اسود ناشف .
٢. بوك او محفظة : هالبوك خذيته من نيولوك الافنيوز وقعت بغرامه بسرعه لاني احب الديزي نسيت اسمها بالعربي المهم وقعت في غرامه 3>
٣. معقم يدين : كنت اخذ معقم باث اند بودي ووركس بعدين استوعبت ان الكميه جدا قليله مقابل القيمة وفي وايد معقمات بالجمعية بنفس السعر وريحتها حلوة و تقريبا ضعف الكمية و مع بيبي عمره سنه ونص صدقوني راح تحتاجونه وايد .
٤. عطر صغنون : هالعطر اسمه english pear and fressia خذيته من jo malone اللي بالافنيوز حجمه مناسب للجنطة بالنسبه للعطر نفسه ما اقدر اقول عجبني وايد اهوا حلو بس مادري ليش بالمحل كانت ريحته احلى سعره مبالغ فيه بالنسبه للحجم و الريحه نفسها، ماراح اشتريه مره ثانية .
٥. كريم من فيكتوريا سيكرت حجمه مناسب للجنطه مو ثقيل وايد فما اقدر اقول انه مثالي لترطيب اليد حطيته بالجنطة بس عشان اخلصه .
٦. مفاتيحي طبعا مفاتيح البيت و السيارة و الميداليه هدية من اختي من jimmy choo.
٧. جنطة مكياج صغيرة : الجنطه كانت مع ست من ماك خذيته قبل سنتين تقريبا ، حاطه فيها بس اساسيات المكياج عشان اذا كنت مستعيله اقدر اتمكيج بالطريج ماني مطوله عليكم فبذكر لكم محتويات الجنطةز عالسريع : بوبي براون سكين فاونديشن كريم اساسي المفضل وما افكر ابد اني اغيره ، بلاش من ماك اسمه melba , ماسكرا they´re real من بنفت ،كونسيلر من ماك ،ليب لاينر احمر من بورجوا.
٨. نظارة شمسيه من tory burch .
٩. واخيرا اكييد طبعا الشي اللي ما نستغني عنه ابدا
كفر الايفون خذيته من محل فوشيا اللي بالافنيوز يم كارفور
وبس هذي محتويات جنطتي حاليا وطبعا المحتويات قابله للزيادة والنقصان على حسب المشوار انا كنت من البنات اللي يحطون كل كبتهم بالجنطه بس بعدين سمعت وايد دكاترة يحذرون من وزن الجنطة فبطلت وقمت اخذ بس احتياجاتي اتمنى انه البوست عجبكم والقاكم على الف خير ان شاء الله في بوست ثاني
have a nice day :)
نقطة .
ليست هناك تعليقات:
إرسال تعليق